Letter to Phnom Penh Post by HE Sam Rainsy
២៤ កុម្ភៈ ២០១៦ / 24 February 2016
លទ្ធិប្រជាធិបតេយ្យសម្រាប់ប្រជាជាតិយើង តម្រូវឲ្យដាក់បញ្ចូលជនជាតិខ្មែរនៅឯនាយសមុទ្រផងដែរ / Democracy for our nation must be inclusive of overseas Cambodians (*)
មតិរបស់ខ្ញុំ ចុះផ្សាយក្នុងកាសែត ភ្នំពេញប៉ុស្តិ៍ ថ្ងៃ២៤ កុម្ភៈ ២០១៦
ជម្រាបមកលោកនិពន្ធនាយក
ខ្ញុំសូមធ្វើការអត្ថាធិប្បាយខ្លះទៅលើអត្ថបទ មានចំណងជើង “នាយករដ្ឋមន្ត្រីអះអាងថា ខ្មែរនៅក្រៅប្រទេសមិនអាចបោះឆ្នោតបានទេ” ដែលចុះផ្សាយលើទំព័រកាសែតភ្នំពេញប៉ុស្តិ៍ ថ្ងៃ១៧ កុម្ភៈ ២០១៦។
ការបោះឆ្នោតដែលមានលក្ខណៈប្រជាធិបតេយ្យ លើកដំបូងបង្អស់នៅកម្ពុជា ដែលរៀបចំដោយអង្គការសហប្រជាជាតិ កាលពីឆ្នាំ ១៩៩៣ ដោយប្រើប្រព័ន្ធសមាមាត្រដូចគ្នានឹងបច្ចុប្បន្ននេះដែរ ក៏បានផ្តល់លទ្ធភាពឲ្យជនជាតិខ្មែរ នៅឯបរទេសអាចបោះឆ្នោតបាន ដោយបង្កើតការិយាល័យបោះឆ្នោត នៅតាមការិយាល័យអង្គការសហប្រជាជាតិ ប្រចាំទីក្រុងញូយ៉ក (សហរដ្ឋអាមេរិក) ទីក្រុងប៉ារីស (ប្រទេសបារាំង) ទីក្រុងហ្សឺណែវ (ប្រទេសស្វីស) និងទីក្រុងកាន់បេរ៉ា (ប្រទេសអូស្ត្រាលី)។
ក្នុងឋានៈខ្ញុំជាសមាជិកឧត្តមក្រុមប្រឹក្សាជាតិកម្ពុជា ក្រោមអធិបតីភាពសម្តេចព្រះនរោត្តម សីហនុ ខ្ញុំបានពិភាក្សាជាមួយលោក Yasushi Akashi តំណាងជាន់ខ្ពស់អង្គការសហប្រជាជាតិ អំពីការរៀបចំការបោះឆ្នោតពេលនោះ។ ខ្ញុំបានស្នើឲ្យលោក Akashi បើកការិយាល័យបោះឆ្នោតច្រើនជាងនេះ ក្នុងពិភពលោក ជាពិសេសនៅក្នុងប្រទេសនិងតំបន់ ដែលមានជនជាតិខ្មែររស់នៅច្រើនជាងគេ (សហរដ្ឋអាមេរិក ប្រទេសបារាំង ប្រទេសកាណាដា ប្រទេសអូស្ត្រាលី និងប្រទេសញូហ្សែលែន)។ លោក Akashi បានឆ្លើយតបចំពោះសំណើររបស់ខ្ញុំថា អង្គការសហប្រជាជាតិមិនមានមធ្យោបាយ និងពេលវេលាគ្រប់គ្រាន់ទេ សម្រាប់បើកការិយាល័យបោះឆ្នោតលើសពីនេះ ឲ្យជនជាតិខ្មេរនៅក្រៅប្រទេស ប៉ុន្តែប្រទេសកម្ពុជាអាចធ្វើដូច្នេះបាននាពេលអនាគត គឺនៅពេលដែលប្រទេសយើងមានស្ថានទូត និងស្ថានកុងស៊ុល នៅតាមបណ្តាប្រទេសដ៏ច្រើន ជុំវិញពិភពលោក។
ក្នុងនាមអង្គការសហប្រជាជាតិ លោក Yasushi Akashi យ៉ាងហោចណាស់ ក៏បានបញ្ជាក់ជាគោលការណ៍ថា ជនជាតិខ្មែរទាំងអស់ ទោះជារស់នៅទីណាក៏ដោយ គឺមានសិទ្ធិបោះឆ្នោតសម្រេចជោគវាសនា នៃប្រទេសកំណើតរបស់ខ្លួន ហើយ អាជ្ញាធរត្រូវជួយសម្រួលឲ្យពួកគេ មានលទ្ធភាពប្រើប្រាស់សិទ្ធនេះយ៉ាងជាក់ស្តែង។
